Ayiti-Manifestasyon : Plizyè santèn senpatizan ak fanatik lidè lavalas la mache pou di ansyen prezidan Aristid asepte asire Tranzisyon an.
Okay 16 jen 2022
Jan òganizatè yo te anonse l, jedi 16 jen 2022 a, plizyè santèn lavalasyen, fanatik ansyen prezidan Jean Bertrand Aristide manifeste kontantman yo paske non lidè a ap site kòm moun yo di kominote entènasyonal la wè ki ta dwe pran tèt Tranzisyon an pou 2 lane.
Rimè san fondman sa a anflame deba yo toupatou nan peyi a. Pou rezon sa a fanatik Aristide yo nan 3zyèm Vil peyi a pwofite pran lari a ak yon bandwòl ladan l nou te ka li: « Prezidan Aristide pèp Ayisyen dakò, yo chwazi w», ak plizyè foto lidè avi pati Fanmi Lavalas la ki pann nan kou yo ap chante danse lakontantman yo.
Grandèt fanm kou gason, jenn kou timoun anba son yon bann rara mache soti nan kafou Tiraryè pase nan plizyè ri nan sant vil la, monte sou boulva 4 chemen, avni katajena pwolonje, premye gran ri, Divivye Hal pou retounen nan sal klèb Tirayè a kote òganizatè yo remèsye patisipan yo ki reponn ak apèl sa a.
Ki kote fanatik ansyen pè Sen Jan Bosko a jwenn koze sa a? Kilès yo sa ki chwazi li a? Kisa direktwa pati a di sou koze? Eske se nostalji ki anvayi fanatik Titid yo? Antouka, okenn nan fanatik yo pa te ka di plis. Si fanatik yo te dispèse nan dènye 12 lane sa yo paske yo te ak Jude Célestin, Henry Céant, Marise Narcise, Jean Charles Moïse, elatriye ,sanble jwenn yon bon rezon pou yo rasanble yo. Lanmou pou lidè karismatik la sanble fèm nan vil Okay.
Nan mach sila a, gwo pwoblèm yo tankou rele kont: lavichè, ensekirite, kindnaping, asasinay, pou Matisan debloke, pat twò nan bouch manifestan yo. Men pou kèk ki te reponn kesyon radyo Télé Montagna, di depi lidè a asepte pran gouvènans pouvizwa peyi a jan kominote entènasyonal la ta pwopoze l tout pwoblèm sa yo ak kaba.
Sa genyen kèk mwa depi 42 òganizasyon nan sosyete sivil la -nan lide pou jwenn yon solisyon ayisyen- te eli 2 pèsonalite politik nan yon eleksyon endirèk pou pòs Premye Minis ak Prezidan pou ta asire Tranzisyon Koupe fache ak mòd Leta dechèpiyè ki nan tèt peyi a depi konze yo te fin asasinen papa Nasyon an, Anperè Jan Jak Desalin. Pati « Fanmi Lavalas » bò kote pa l ki te siyen akò Montana a te rale kò l epi kritike demach demokratik sa a anpil lòt sektè te apiye.
Ansyen prezidan Fanmi lavalas la, Jean Bertrand Aristide te deja nan tèt peyi a 2 fwa. Malgre li pa t janm boukle manda l, plizyè òganisazyon te denonse move pratik li men lafanmi pa t janm rive chita bò tab la korèkteman tèlman granmanjè yo te opilan.
Maks- Enmbèr Marslen
