Ayiti- Jistis-. 48èd tan aprè Gregory Oscar fin tonbe anba bal, komisè Gouvènman Okay la mete aksyon piblik anmouvman nan mete manda arestasyon ak entèdiksyon pou 2 avoka pa kite peyi a selon 2 dokiman k ap sikile sou platfòm entèlijan yo.
Okay, 10 jen 2022
Komisè Gouvènman jiridiksyon Okay la, Mèt Ronald Richemond ki reponn kesyon “Radyo Télé Montagna” pa watsap konfime, li ekri Direktè Emigrasyon ak Imigrasyon, Cainculli Joseph nan dat 10 jen 2022 a pou mande l anpeche Haby Fabre ak Herby Decossard kite peyi a pa youn nan 3 mwayen sa yo: Tè, lanmè ou Anlè paske yo ta patisipe nan asasina Gregory Oscar, sitwayen ayisyen natiralize ameriken pou yon dosye tè.
Fabre ak Decossard se 2 avoka k ap milite nan Depatman Sid la. Premye a nan Bawo Okay la, lòt la nan Bawo Aken an. Avoka militan sa yo gen akizasyon k ap peze sou do yo kòm moun ki nan Asosyasyon malfèktè ak fè fo papye. Antretan Lajistis mande Lapolis pou l chache youn ladan yo, Haby Fabre epi mennen ba l.
Se pa premye fwa non Haby Fabre site nan dosye louch sa yo. Li te deja gen manda dèyè l men lajistis pa t janm rive arete l jiskaske dosye a te vin klase san swit.
Pou kèk obsèvatè, pwosedi yo lanse. Y ap tann Direksyon Enspeksyon Jeneral PNH la idantifye polisye asasen an epi remèt li bay lajistis ak pou Komisè gouvènman an kontinye voye manda bay tout moun non yo ap site nan dosye konfli tè sa a ki lakòz jenn antreprenè a pèdi lavi l.https://radiotelemontagna.com/ayiti-ensekiritekonfli-nan-zafe-te-alabaz-asasinay-yon-sitwayen-nan-okay/
Maks – Enmbèr Marslen.
