Wisler Berger aka Bibi se non jenn gason sa Komisè Jean Ernest Muscadin ak ekip li egzekite nan estasyon kamyònèt yo nan won pwen pou monte sou Boulva Kat Chemin an, daprè konsta radyo Montagna.
Okay, jedi 21 novanm 2024
Daprè enfòmasyon yo, se bò 4trè 20 konsa nan aprè midi aksyon sa pase. Selon yon sous nou fè konfyans se nan zòn kafou Levi komin Kanperen komisè Muscadin ak ekip li te al mete men sou prezime kriminèl, dj, chofè taksi a epi antre ak li nan vil la pou vin egzekite l.
Wisler Berger, daprè reprezantan dwa moun lan, Jean Bénissel Belas ki reponn kesyon radyo Montagna, prezime brakè a se nèg Fèm Leblan. Li se youn nan gwoup Bakòp Bosal k ap opere nan plizyè komin: Dusis, Tòbèk, Kanperen ak Okay.
Pa gen twòp enfòmasyon sou Kouman otorite yo fouke prezime kriminèl la ni kisa ekip komisè a ta jwenn sou li ki lakòz li vin vide bal sou li. Ekip komisè a deja voye nan peyi san chapo plis pase 5 moun li akize ki nan move zafè nan depatman Sid la.
Yon lòt kote, bò 7tè nan aswè jedi 21 novanm lan, nan blòk Simon, gen 2 moun ki mouri anba bal, ladan yo Timakout ki rann dènye souf li nan lopital. Yon dam kite ak li mouri sou plas. Dapre premye enfòmasyon yo se ta bandi ak zam ki retire lavi yo.
Si gen echanj se nòmal ka gen lanmò men si otorite yo deja mete men nan kòlèt prezime kriminèl yo se ta Kenbe pou yo bay plis enfòmasyon sou asosyasyon kriminèl sa yo.
Maks – Enmbèr Marslen
RTM
