Nan yon nòt pou Laprès, Konbit Ekolojis Sid soti jodi 27 septanm 2024 la, nou gen yon kopi, felisite Konsèy Minipal Okay la pou kouraj li lè l pibliye Arete Minisipal la sou : Environnement / Aires protégées – numéro : 2024-08/01. Arrêté portant déclaration Aires protégées et gestion de l’environnement de la Commune des Cayes.
Okay 27 septanm 2024
Nòt pou Laprès
Pozisyon Konbit Ekolojis Sid (KES) sou Arete Minisipal, premye septanm 2024 la.
Konbit Ekolojis Sid wete chapo l pou salye kouraj komisyon Kominal Okay la poutèt li pran yon ARETE nan dat premye septanm 2024 la sou pwoblematik anviwonmantal la ki ka ede anpil nan pwoteje lavi nan depatman Sid la.
Konbit Ekolojis Sid (KES) pran nòt sou piblikasyon sa. Lide Arete Kominal la kwaze ak pil chwal batay Konbit Ekolojis Sid la pa sispann denonse nan komin Okay kou rès depatman Sid la. Jan nou toujou di sa : « Anviwonnman se kad pou Lavi boujonnen ».
ARETE kominal la gen anpil enpòtans epi li nesesè. Li se yon zouti legal pou konbat degradasyon anviwonnmantal ak move kalite lavi moun.
Konbit Ekolojis Sid (KES) konstate se yon gwo pa ki franchi men Arete a se yon ti gout dlo nan lanmè a tèlman gen pwoblèm anviwonmantal ak desizyon ki pou pran toujou.
Konbit Ekolojis Sid (KES) di pibliye Arete a se youn,men ki mekanis meri a ap mete anplas pou garati aplikasyon Arete a? Kijan meri a pral fè pou vilgarize Arete a epi chache kolaborasyon lòt sektè, ak tout popilasyon an pou garanti efikasite mezi sa yo?
Konbit Ekolojis Sid felisite travay sa detan nou ap veye pou mezi legal sa yo aplike tout bon vre.
Jeanne Marceline Pinèt
Gerard Marcelin
Max Imbert Marcelin
Chrismène Sévère
Jean Benoit Daniel Leblanc
Michel Ange Lafond
Kenson Jean
Yvelson Macena
Luidji Poborsky Saël
Pou otantifikasyon :
Gerard Marcelin
Chrismène Sévère
