2 otorite klamè piblik pa t pran tan pou lonj dwèt sou yo nan zak asasinay sou jounalis Garry Tesse nan mwa oktòb 2022 pase a, reponn kesyon nouvo jij k ap mennen enstriksyon an, daprè konsta radyo Montagna.
Okay 17 jiyè 2024
Aprè Yvana Despagne Tesse, Vano Tesse, PDG Fritz Carlos Lebon semenn pase, jodi mèkredi 17 jiyè sa a se tou pa Direktè radyo Lebon an, Georges Valince, DDS- PNH la, Daniel Compère ak jal komisè Ronald Richemond Ministè Jistis mete lwen biwo l pou kèk plent ministè a resevwa kont li ki defile nan kare Jij/ Jij enstriktè Jean Michelet Séide.
Kirye yon bò, fanatik yo lòt bò, akonpaye ansyen chèf pousuit jiridiksyon Okay la ki pase mwens 2zèd tan ap reponn kesyon jij la kòm enkilpe nan dosye asasinay lach sa a. Si fanatik li yo ak yon bann rara te kontan wè li antre epi soti nan yon titan tou kout, ba l ochan epi mache ak li, yon lòt kote anpil obsèvatè ret kwè se ranmanse jij la koumanse ranmase eleman ki pou pèmèt li fè travay li san fòs kote. Yo swete jij la jwenn tout sa l bezwen pou l mennen dosye a jouk nan fen l.
Depi madi 9 jiyè 2024 pase a, malgre demand li yo pa konble nan jwenn sekirite, materyèl pou sikile kou pou l travay sinon mi kloti Palè Jistis la ki demare depi 8 jou, Jij Séide, detèmine demare ak enstriksyon dosye sasinay jounalis la kou pil lòt li gen sou responsablite l.
Yon lò kote, nan dat 8 jiyè 2024 pase a nan yon lèt aktyèl komisè jiridiksyon Okay la, James Jean Louis voye bay Jean Michel Azor responsab prizon sivil Okay la, mande l pou l pran tout dispozisyon pou ansyen sekirite komisè a Ricardo Bain aka Tichito ki fèmen nan prizon sivil kafou retounen nan jiridiksyon an pou Jij/ Jij enstriktè a Séide ka tande l nan kad dosye sa a.
Ricardo Bain nan divès deklarasyon li bay « SOS Journalistes » kou patisipasyon nan divès emisyon radyo avwe li te okouran epi sètifye Jal komisè Ronald Richmond ak ekip li ki asasinen Garry Tesse.
Sa fè lontan je pa branche sou travay aktè yo nan jiridiksyon Okay la. Dosye sou dosye, se negosye yo negosye olye yo rive nan bout yo pou yon leson ta rive bay pou lajistis blayi ak pou lotè zak kriminèl yo peye pou egzaksyon yo.
Maks – Enmbèr Marslen
RTM
