Anpil moun nan komin Okay denonse chita dous lajistis ak Lapolis ki pa t souke kò yo atan pou te anpeche 2 moun sou yon moto kite vil Okay ak kadav Smith Benjamin aka Wagli ki mouri sou kabann lopital mèkredi 12 jen 2024 la, aprè papa l te fin maspimen l nan lavèy.
Okay, vandredi 14 jen 2024
Moun yo dlo nan je, dezavwe zak sa a ki pase nan site EPPLS ki chita nan zòn Sidès vil Okay. Premye enfòmasyon yo ta fè se dechire oubyen li te pran yon biyè 1000 goud pou papa l ki lakòz li te bat li anpil epi pouse l al frape nan yon mi. Men plizyè lòt moun nan site a ki reponn kesyon radyo Montagna voye pawòl pran lajan an jete byen lwen. Yo di se paske Wagli pa t vle al pran leson jou madi 11 jen an ki te jou fèt li ki fè papa a te malmennen l nan ba l kout pwen tout kote nan kò l, figi l pa t epanye.
Papa a, Loulou ensikoni se yon chofè taksi. Manman an li menm, Modeline, ap vann nan mache « Le Relais ». Fanmi lan gen 2 pitit; yon fi ak Wagli ki te nan 5kyèm Ane Fondamantal nan yon lekòl nasyonal nan vil la.
Daprè responsab òganizasyon UFADESH ki te sou plas di radyo Montagna lè l rive nan katye popilè a moun yo t ap kriye epi se nan menm moman an li konstate 2 mesye aranje kadav timinè a nan mitan yo epi file ak li.
Jean Bénissel Belas kontinye pou l di mòd zak sa yo imilyan. Pou lajan pou yon papa bat pitit gason l ki gen 11 lane pou rive al pèdi lavi l? Menm si Loulou se sèl lajan sa li te gen nan pòch li te dwe kontwole l pou l pa t ba Timoun lan move kou yon pa epi denonse moun nan site a ki pa t pote Wagli sekou yon lòt pa, mande Leta pran mezi nesesè pou rive kaba koze bat Timoun nan peyi a kote yo konn domaje lè sa pa pi grav.
Si nou kwè sa kèk moun nan katye popilè EPPLS a di, papa Timoun sa a , Loulou, se yon sadık. Sa pa gen lontan paske yon manman chen te antre lakay li, li te rache chen an ak kout manchèt epi rache tèt kou ti chen yo ak men l. Kòm se nan komin Dusis zòn Fòmon nan lokalite Siren yo ale ak mò a, se pou otorite yo nan jiridiksyon Okay la double jefò yo pou yo ka mete men nan kòlèt prezimè asasen an.
Zak sa a montre yon lòt fwa komin lan lage. Menm lè enfòmasyon yo ale jwenn reponsab yo, yo pa briding kò yo. Soti Okay monte pon Salomon, pran Tòbèk, Disis te gen twòp mesaj pou lajistis ak lapolis te ka reyaji vit.
Antèman Smith Benjamin aka Wagli chante ayè jedi 13 jen 2024 nan Platon. Ale nan pwovens al antere l pa vle di tout bagay fini. Sosyete a ap tann Lapolis ak lajistis jwe wòl li.
Sa pa gen lontan pou nou pi si, lendi 20 me 2024 pase a nan St Marc, direktè lekòl « Institition Georges Sylvain de Frecyneau », Clément Lanier Geffrard pèdi tout bon sans li, lisidite l nan bat yon jenn demwazèl 23 lane, Britnney Bernard. Dwa entegrite yon timoun dwe respekte. Plen lòt mwayen pou yon direktè kou paran pini yon tmoun olye se aksyon bosal sa yo k ap fèt sou yo. Daprè sikilè MENFP, baton pa dwe nan lekòl yo selon lalwa ki soti nan jounal ofisyèl peyi a « Moniteur » # 80 nan dat lendi premye oktòb 2001.
Maks – Enmbèr Marslen
