Yon moun mouri, yon lòt kouche nan OFATMA ak 2 pye kase ap pran swen ka l nesesite, youn nan machin yo kòlboso, se bilan Kolizyon 2 kamyon machandiz ki fèt bò 3zè konsa, maten dimanch 18 fevriye 2024 la nan Simon, seksyon kominal komin Okay la.
Okay, 18 fevriye 2024
Si nou kwè premye enfòmasyon yo, ta sanble se dòmi ki pase nan je chofè kamyon tèt wouj la ki voye l al antre sou kamyon tèt koulè blanch lan ki t ap monte nan direksyon Ayewopò Antwàn Simon Okay la. Wouj la te chaje ak sak chabon tanka lòt la t ap transpòte siman , fè elatriye.
Alète kèk minit aprè, mesyedam Sapè ponpye kazèn Okay la, ak mèg mwayen yo te pral soti chofè ki te ret kwense nan plas li a. Chofè lòt kamyon ki t ap antre nan direksyon sant vil Okay te kouri kite kamyon an. Enfòmasyon yo fè kwè, ajan nan sèvis sikilasyon an rekipere tout dokiman yo te jwenn nan kamyon sa a pou swit nesesè.
Byen ta aprèmidi dimanch lan, kamyon sa a te rete bò wout la nan zòn lan olye lapolis te remòke al mete nan komisarya Okay la.
Nan dènye jou sa yo, ka aksidan yo nan komin Okay la vin pi dri. Daprè Pòt Pawòl PHN/ Sud la, Enspektè Lesage, Sèvis Sikilasyon anrejistre pou mwa janvye 2024 la , 6 ka aksidan ki te lakòz 6 mò ak 4 blese. Sa gen 2 jou, 3 moun ki te sou moto, ladan yo yon fanm pèdi lavi yo nan twoson wout sa. Li ta enpòtan pou ajan polis yo ta pi prezan sou wout la nan poste oubyen nan monte desann pou avèti epi sanksyone tout kondiktè k ap fè egzibisyon k ap mete lavi yo kou lòt andanje sou wout nasyonal yo.
Max – Imbert Marcelin (Maks- Enmbèr Marslen)
RTM
