7 jou aprè Komisè Gouvènman Pòtoprens lan, Edner Guillaume te mete manda dèyè Myrthil Marcelin aka Arad, nèg ame nan back up Delege Depatmantal Sid arete l nan komin Okay la, maten lendi 12 fevriye 2024 la.
Okay, lendi 12 fevriye 2024
Se sou akizasyon asosyasyon malfèktè, pouse moun fè vyolans ak konplo kont sosyete a ki sou do militan politik « Jovnelis » la ki fèmen nan gadavi komisarya santral la. Daprè yon sous nan lajistis la, jal komisè Okay la, Ronald Richemond pral gen pou voye misye nan jiridiksyon Pòtoprens lan nan yon titan tou kout.
Opozan ak rejim PHTK 3 vèsyon an, Myrthil te ak zanmi l, KASEK Kendrick Maisonneuve ak yon lòt moun nan machin lan t ap antre nan zòn Lwès vil la, lè sekirite reprezantan Prezidan/ PM defakto a, mèt avoka Ketnor Estinvil la te kanpe yo epi arete Arab ak yon jenn gason ki te libere nan lakou a Komisarya a san defòm pose. Kilès li ye? Pouki yo lage l? Ki wòl li te jwe? Antouka, gen lòt ki panse se li menm kite jwe wòl trèt pou livre Nèg Arab la.
Daprè enfòmasyon yo, Marcelin nan vil la depi ayè dimanch 11 fevriye 2024 la. Li te vin pote soutyen l ak Tab Mobilizasyon Sid ki t ap pare yo pou manifeste nan komin lan. Arestasyon sa rive apre pakè Pòoprens te fin voye yon manda envitasyon bay Nèg Arab ki pat reponn ak envitasyon annapre Me Elysée Fenelon.
Nan dènye jou sa yo, militan politik la nan tout konferans, manifestasyon ap repete pawòl revolisyon ansyen prizonye pou trafik dwòg ak lave lajan sal la, Guy Philippe ap pouse nan peyi a. Anpil fwa, li konn ap distribiye manchèt nan peyi a pou mande sitwayen yo leve kanpe.
Pou kèk sitwayen, yo swete se pa machin represyon rejim otoritè a demare dèyè tout moun k ap kritike lese ale otorite ki pa fè anyen kont klima ensekite sou tout fòm k ap brase bil peyi a.
Yon lòt Kote, okenn bann madigra kou klèb ki pi ansyen yo pa kite sal yo nan epòk madigra a. Mabouya, Sodya, Full Rasta, Mistik, Gabòt, Tirailleurs, Avenir… pa gate kanavalye yo. Yon sitiyasyon ki fè anpil moun panse se paske kanaval la pat janm te okipe yon plas ki fè menm klèb ki gen plis pase 50 lane pa kenbe tradisyon an.
Maks – Enmbèr Marslen
RTM
