10 mwa aprè asasinay konfrè jounalis Garry Tesse (25 oktòb 2022), asosyasyon « SOS journalistes » prezan nan kad yon misyon nan Depatman Sid la sou ka jounalis ki nan prizon espesyalman Guerland Hyppolite pakè Okay akize l kòm youn nan lotè asasina Garry Tesse.
Okay 30 out 2023
Responsab « SOS jounalis » yo, Guyler Cius Delva, deklare bay kèk jounalis, li anmisyon nan jiridiksyon Okay la, san bay depi ki jou ni Konbyen tan l ap dire, sou ka jounalis ki fèmen nan prizon sivil Okay.
Nan rankont reponsab la ki te akonpaye ak chofè l ak kèk konfrè jounalis nan lakou Nami restoran di « SOS Jounalis » solidè ak akize jounalis Guerland Hyppolite ki ap kouri sou 8 mwa depi l fèmen nan prizon sou ankèt pakè Okay kòm prezime asasen Tesse . Guyler Delva, di li te pale ak chèf pakè a ki pa nan peyi a. Nou ap raple klamè piblik site non jal Komisè Ronald Richemond kou DDS/PNH la, Daniel Compere ki ta gen men yo tranpe nan zak Kriminèl sa a.
Jounalis Delva te pwofite denonse menas li di jij ki sou dosye a, Robert Jourdain di l ap sibi. Daprè li, jij la ta menm panse depòte l paske li krent pou lavi l san di ki Kote menas sa yo ta ap soti. Nou ap raple se ta òdonans dosye a pou jij la ta dwe remèt alè isit. Men kou anpil lòt, dosye a ap tatonnen.
Pou youn nan avoka k ap defann madan viktim lan, mèt avoka Maxon Esta, menmsi « SOS Journalistes » anmisyon byen ta, aprè 10 mwa asasinay jounalis animatè emisyon politik la, Garry Tesse -yon eskandal- epi 8 mwa depi Guerland Hyppolite fèmen kòm moun ki t ap denonse enplikasyon Komisè a nan zak lach sa, panse se yon bon inisyativ. Mèt la kontinye pou l di, li kontan responsab la retrakte epi deside vin foure je gade.
Pou jounalis Charles Boyer, youn nan animatè 2 emisyon politik: Gran Lakou ak Klòch la Sonnen sou radyo Lebon 102.1 FM, deklare bay RTM misyon sa a byen vini. Li swete limyè fèt sou dosye a epi pou tout moun ki enplike pre kou lwen peye pou zak sa a yon fason pou okenn lòt jounalis pa konnen menm tretman sa a pou opinyon l.
Nan prizon sivil Okay gen 2 jounalis: Guerland Hyppolite prezime asasen Garry Tesse ak Max Angel Narcisse aka Angelo prezime vòlè Machin. Pou ki se youn nan jounalis ki nan difikilte yo ki entèrese « SOS Journalistes »? Eske dosye pa jounalis Narcisse la pi konplike? Antouka, kòm se anmisyon asosyasyon an ye, li ta dwe panche sou toulède vin jwenn ka gen abi paske yo pa t janm sispann lonje dwèt sou jal Komisè gouvènman jiridiksyon Okay la ki ta lotè entèlektyel asasina jounalis fonde pouvwa Garry Tesse.
Misyon SOS Jounalis yo sanble yon misyon telegide, zanmitay ki vin sove youn epi kloure lòt pandan yo chak ak yon dosye Kriminèl k ap tann lajistis tranche.
Max Imbert Marcelin ( Maks – Enmbèr Marslen)
RTM
