Depi efondreman Linyon Sovyetik la, peyi oksidatal yo pran abitid trete tèt yo kòm mèt mond lan san konsiderasyon pou pèsonn sou latè. Gè frèt te fini, yo panse ke lekòl la lage pou fè sa yo vle nan peyi domine yo.
Kanada Pran Tèt Envazyon An, Sa k Di Pèp La Pral Akeyi l Ak Fèy Bwa!
Sa fè plizyè dizèn lane depi militè Etazini, Lafrans ak Kanada pran abitid vin pyafe nan savann neyokoloni an ak objektif kreye kondisyon deblozay pou rann peyi a engouvènab pou jistifye prezans yo. An 1994, Etazini voye 22 mil sòlda vin kraze lame dAyiti pou kite 70 al 100 mil zam gaye nan lanati san kontwòl, pou kreye ensekirite nan peyi a. Yon titan apre, Minista pral distribye pikòp zam ak minisyon pa bann ak pakèt nan anpil katye popilè nan Pòtoprens ak sousi, pou ranfòse lide kawo a. Konsa, kan Kanada, Etazini ak Linyon Ewopeyèn te pran desizyon destabilize Ayiti nan reyinyon Otawa 2001 an, ajan dezagreman yo te deja gen gwo baz bandi solid sou teren an pou fè travay la. An 2011, Obama ak Biden ki te itilize LOEA pou mete Swit Miki Prezidan pou kache vizaj Etazini nan vòl ak piyaj 17 milya dola rekonstriksyon an, pral pwofite pase mayèt ajan ensekirite yo anba kontwòl ekip bandi legal la, ki te gen misyon devlope fenomèn Gang lan ak benediksyon legal pouvwa PHTK a. Ositou Core-Gwoup, men nan men ak PHTK pral striktire Gang G9, federe yo pou mete peyi dAyiti tèt anba. Se nan katchouboumbe sa a, moun sezi tande Kanada ki te nan konplo ak federasyon Gang anndan Core-Gwoup la, prezante tèt li brisoukou kòm fòs moral ak militè ki gen otorite pou kwape ansyen alye Gang yo sou teran an. Donk kesyon n ap poze, ki sa Koukou te fè pou frize, pou l ta rele premye pitit li frizelya?
Depi efondreman Linyon Sovyetik la, peyi oksidatal yo pran abitid trete tèt yo kòm mèt mond lan san konsiderasyon pou pèsonn sou latè. Gè frèt te fini, yo panse ke lekòl la lage pou fè sa yo vle nan peyi domine yo. Pafwa yo rive fè bidjè sou richès lòt peyi depandan yo tankou nou te wè sa nan lwa Kongrè ameriken te vote an 2022 a kote yo deklare tout resous ki anba tè peyi nwa yo an Afrik kòm nan lòt kontinan yo se pou Etazini. Nan ka Ayiti a sitiyasyon yo pi konplike. Apre tranbleman tè 2010 la, Nasyonzini ranmase 17 milya dola pou ede rekonstwi peyi a. Etazini ki te pran jesyon lajan an, vòlè prèske tout kòb la san konstwi menm yon tonnèl pami 30 mil kay ak wout ki te dwe fèt nan plan rekonstriksyon an. Lè pèp ayisyen te pran chimen tribinal, Obama te mete veto pou anpeche limyè fèt pou mare eskamotè ameriken yo tankou Bil Klintonn ak madanm li, sou pretèks bèf te pou rwa, Etazini gen dwa vòlè lajan rekonstriksyon an, san rann kont bay pèp ayisyen an tou senpleman paske ameriken yo gen gwo zam. Nan kesyon politik, eleksyon Jovnèl 2015 ak 2016 yo nan peyi a montre kouman peyi ki nan Core-Gwoup yo, ap pase Demokrasi nan betiz, lè yo te chwazi antre nan yon jwèt sovaj kont pèp ayisyen an, pou enpoze peyi a Jomo Apredye nan gwo maskarad elektoral yo. Se nan kontèks politik makawon sa a, pèp la te deside pran beton an 2018 ak yon revandikasyon ki mande mèt neyokoloni an sispann chwazi vwayou pou sèvi jiwèt nan tèt peyi a e ke sistèm dominasyon kolonyalis la rive nan bout li. Peyi lòk, grèv ak manifestasyon san pran souf nan tout peyi a ak nan dyaspora te fè enperyalis yo santi ke pèp la deside goumen tout bon vre. Ositou ameriken ak Core-Gwoup te deside òganize Gang yo pi byen, kote Donald Trump te voye mèsenè pou antrene, ame ak federe yo nan peyi a kòm fòs latèrè pou kraze mobilizasyon popilè a. Se pou tèt sa, kidnaping, vòl, vyòl tounen règ nan tout peyi a anba kontwòl pouvwa Gang PHTK sou sipèvizyon Core-Gwoup la. Jodi a, Sendika Core-Gwoup la ap foure bouch nan tout aktivite ekonomik ak politik peyi a. Yo nome moun nan Leta, fikse pri gaz, fè mete taks sou do pèp la, fè lajan nan move zafè e itilize Gang yo pou mete baboukèt nan bouch tout moun, paske yo pagen kredi nan je popilasyon an pou òganize kwak seswa nan peyi a. Se nan sans sa, mafya ki nan Depatmandeta deside voye Kanada okipe peyi a pou seye ranfòse aksyon Gang yo sou teren an, pou pèp la rive aksepte rejim mafya politik Core-Gwoup mete nan tèt peyi a pou yon fèt akonpli. Sepandan, nati revandikasyon yo ki sou beton an ak reyalite sosyo-ekonomik peyi a pral rann tach okipan kanadyen yo pi difil sou teren an chak jou bondje mete.
Kidonk, devan mobilizasyon pèp ayisyen pou denonse mepri ak awogans kolonyalis ki nan Core-Gwoup yo, majòjon ekip mafya deziye Kanada pou l parèt tèt li devan bann nan, pou vin tante debloke kabwèt mafya entènasyonal la ki kole nan labou peyi dAyiti. Konsa, pou amenaje teren an y ap chache laji baz politik ekip mafya ak yon bann Bayakou politik ki dwe antre vin bay kowòm nan antouraj pouvwa Gang PHTK Aryèl Anri a ki gen misyon enstale yon lòt trafikan domèstik nan tèt peyi a. Sepandan, mouvman alevini sa yo pagen anpil chans pou reyisi paske pèp la te deja mete tout Bayakou k ap defile dèyè ponyen zèb yo, nan menm sak poubèl ak mafya trafikan politik ki nan Core-Core la. Se pou tèt sa, pwogresis ki nan peyi a pa dwe dekouraje. Yo dwe kontinye travay nan mitan mas popilè nan tout peyi a, òganize yo otou lide souverènte peyi a nan domèn politik, ekonomik ak kiltirèl. Apre 108 lane dominasyon Etazini kote ameriken ap demantibile peyi a, apre 20 lane katastwofik Core-Gwoup sou teren an, pèp la deside goumen pou l retire Ayiti anba dominasyon Gang ak mafya entènasyonal la.
Viv Mobilizasyon Pèmanan Pou Pwojè Nasyonal La!
Viv Inite Nan Mouvman Rezistans Lan!
Libète ou Lanmò.
Vwa Rezistans Popilè (No66).-
Komite Rezistans Popilè Benwa Batravil, KRPBB. 27 fevriye 2023.
