Platfòm òganizasyon k ap defann dwa moun yo, POHDH, reyalize soti jedi 16 pou rive samdi 18 fevriye 2023 a yon vizit nan komin Okay pou gen yon lide sou kouman sityasyon dwa anviwonmantal yo ye nan twazyèm vil peyi a. Pandan vizit sila, yo te vizite plizyè espas ak rankontre plizyè aktè kle ki la pou garanti ak pwoteje dwa moun nan vil la ak zòn sou kote li yo.
Okay 21 fevriye 2023
Alermy Piervilus, sekretè Egzekitif, Missondor Petit-Homme, Resonsab Rechèch ak dokimantasyon ak Peterson Derolus se 3 moun ki te nan tèt yon delegasyon ki soti nan POHDH ki vini nan komin Okay pou founi je gade kouman sityasyon dwa anviwonmantal yo ap evolye sitou ak enplantasyon izin vetitvè ak ponp gaz san okenn kontwòl nan tout kwen, gade enpak negatif yo genyen sou lavi moun nan kominote yo. Delegasyon an te rankontre ak kèk oganizasyon ekolojis ak peyizan tankou Peyizan San Tè nan plenn Ditrich, Konbit Ekolojis Sid k ap batay pou yon anviwonnman sen, kou peyizan yo ka travay tè k ap bay manje epi denonse ranbleyaj tè ki ka bay manje, enplantasyon ponp gaz, estasyon gaz pwopẚn ak izin vetivè ki pa sispann reprezante gwo malè pandye sou tèt popilasyon an.
Delegasyon an te rankontre ak plizyè otorite yon lòtbò tankou : Majistra enterimè a, madanm Marie Sylvie Rameau, kòdonatè teren pou MDE/SID , Pierre Joab Desrosiers, objetif la se te pou konenn ki jan otorite sa yo wè enplantasyon deregle izin sila yo epi gade kisa yo deside fè pou pwoteje anviwonnman an parapò ak dega anviwonmantal antrepriz sila yo sou kominote yo.
Pou fini delegasyon an te vizite Jaden Botanik Okay , Tèt Sous Simon ki reprezante kèk pami rezèv ekolojik depatman an ki merite pwoteje.
Vizit la rantre nan kad pledwaye òganizasyon an ap fè sou kesyon dwa anviwonnmantal ki travèse tout lòt dwa yo. POHDH pwomèt yon rapò sou vizit sila yon fason pou enfòme gran piblik la sou obsèvasyon yo fè epi fòmile rekòmandasyon bò kote otorite yo pou fasilite jwisans dwa moun yo genyen pou viv nan yon anviwonnman ki sen jan konstitisyon peyi a garanti sa nan atik 253 a.
Franndy Lesperance
RTM
