Ekip fanm Lyon an, youn nan pi gwo ekip foutbòl nan mond la anonse siyati yon kontra pou 3 lane ak jwèz foutbòl Ayisyen Melchie Dumornay, anpil moun konnen sou non Corventina.
Okay, 16 janvye 2023
Ekip Lyon, kategori fanm lan k ap jwe nan premye divizyon nan peyi Lafrans (D1 Arkema) fè konnen nan yon atik ki pibliye sou sit klèb la se yon onè pou yo akeyi Melchie Durmonay ki t ap jwe nan Stade de Reims D1 Arkema pou yon kontra 3 lane , k ap soti 1 jiyè 2023 pou bout 30 jen 2026.
Dumornay te gen plizyè gwo ekip an ewòp ki te enterese ak li parèt yon jwèz ki gen anpil talan. Li te fome nan AS Tigrès nan peyi Dayiti. Nan Lane 2021 li siyen premye kontra pwofesyonèl li ak ekip Stade de Reims nan premyè divizyon an Frans. Pandan pasaj li an ekip sa a, li make 15 gòl nan 24 match pou tout konpetisyon li jwe ak ekip la.
Corventina fèt nan lane 2003 nan peyi Dayiti, li jwe milye teren ofansif. Li jwe nan plizyè kategori pou seleksyon fanm peyi Dayiti. Li te soti pi bon jèn jwè pou CONCACAF nan lane 2022, epi fè pati pi bon 11 pou zòn nan.
« Se te toujou yon rèv pou m jwe pou ekip Lyon an » deklare vedèt la. M kwè ekip sa ap ede m pwogrese epi genyen plizyè tit. Mwen paka tann pou jwe pou Lyon sitou bòkote Wendie Renard. Se yon modèl wòdpòt pou jèn yo. Mwen ta renmen vini menm jan ak li.
N ap raple ekip Lyon an pran 8 ligdèchanpyon nan listwa l, dènye a se nan dat 21 me 2022 a kote li te bat ekip Foutbòl Baselòn nan 3-1, epi 15 tit chanpyon Frans.
Franndy Lesperance
RTM
