PAPA SAMBA MBODJI, komisè divizyonè, klas eksepsyonèl, jwenn nominasyon l nan men Sekretè Jeneral Nasyonzini an pou vini kòm chèf konpozant polis Nasyonzini nan peyi Dayiti.
Okay, 16 janvye 2023
Helen La Lime ki gen laj 72 lane ki nan te tèt BINUH depi 14 oktòb 2019 pral gen pou kolabore ak PAPA SAMBA MBODJI, yon senegalè ki gen long eksperyans nan zafè reyalizasyon misyon polis nan plizyè peyi pou Nasyonzini, daprè sa plizyè medya nan peyi Senegal fè konnen. La Lime gen gwo denonsyasyon kont li nan peyi Dayiti pou wòl prezime li nan federe plizyè gwo gwoup gang nan peyi a atravè asosyasyon kriminèl G9.
Anpil manifestasyon fèt nan peyi a kou lòtbò dlo pou denonse enjerans La Lime nan zafè entèn peyi Dayiti. Yo denonse yon lòt kote akwentans chèf BINUH an ak plizyè prezime asasen ansyen prezidan defakto Jovenel Moise ki te mouri asasinen anndan lakay li nan Peleren 5, nan dat 7 juillet 2021.
N ap raple pandan madan Helen La Lime la , sityasyon an dejenre nan peyi Dayiti, prezidan mouri, gang okipe tout kwen nan peyi a, pa gen okenn enstitisyon k ap fonksyone.
Peyi a konnen omwens 7 misyon dènye 25 lane sa yo. Men okenn nan yo pa t travay pou estabilize peyi a men pito imilye l nan fason y ap pase souverènte l anba pye a.
Franndy Lesperance
RTM
