Jounal ameriken Washington Post, denonse gouvènman ameriken an ki pote soutyen l bay Ariel Henry, premye minis defakto ki jwe alafwa wòl prezidan depi l pran pouvwa a, pandan l fèmen je l sou popilasyon an k ap patoje nan lamizè. Jounal la denonse Ariel ki san lejitimite epi ki enplike nan asasisen sou pouvwa a, ansyen prezidan Jovenel Moïse, lakay li 7 jiyè 2021 an.
Okay, 23 septanm 2022
Nan yon editoryal li pibliye ayè jedi 22 septanm 2022 a ki pote siyati tout ekip redaksyon seksyon opinyon an, jounal ameriken Washington Post, konfime non Ariel Henry kòm youn nan prensipal kriminèl ki te patisipe nan lanmò ansyen prezidan defakto peyi Dayiti , Jovenel Moise , 7 jiyè 2021 an, nan rezidans prive li , nan Pèleren 5.
Selon jounal la, 14 mwa apre krim nan pa gen okenn vanse reyèl pou fè limyè sou dosye a. Vin gen yon vid ki kreye gwo kawo nan peyi a, eleksyon pa janm rive fèt depi 6 lane, yon siy ki montre Ariel Henry pa gen okenn lejitimite. Sityasyon sa a se responsabilite l paske l enplike nan lanmò ansyen prezidan Moise. Ariel kenbe pouvwa gras ak soutyen Washington ki yon lòt kote lage popilasyon peyi Dayiti a k ap patoje nan mizè ak ensekirite.
Sityasyon dezastrez sa a se yon mwayen pou lanmò ak dezespwa taye banda, epi pouse do aysiyen pou al migre nan lòt peyi. Yo denonse gouvèman Joe Biden nan ki depòte plis pase 25 mil ayisyen atravè yon akò ak premye minis defakto a, Ariel Henry ki panse se pi bon fason pou rezoud kriz migatwa a pandan Washington inyore twoub politik ki gen an Ayiti yo.
Selon jounal la, anpil sektè kle an Ayiti ekri pou mande Ariel Henry demisyone, anpil gwo anbasad oksidantal fèmen pòt yo epi mande anplwaye yo pou yo kache. Menm gen enfòmasyon ki fè konnen, gen polisye ki pa vle al travay akòz nivo vyolans la ki ogmante. Kidonk li enpòtan pou nasyonzini, Oganizasyon Eta Ameriken, gwo peyi yo sitou administrasyon Biden nan pou yo aji vit ak byen pou evite kawo sa a k ap prezante la.
Men jounal la pa janm pale sou yon pwobab enplikasyon administrasyon ameriken an nan konplo pou te asasinen ansyen prezidan an malgre se nan peyi Etazini an majorite planifikasyon krim nan te òganize.
Nou ka li atik Washington Post la nan lyen sa a:https://www.washingtonpost.com/opinions/2022/09/22/haiti-violence-how-to-help/Jo
Franndy Lesperance
RTM
