Ayiti :Taraz , dènye grenn klou pou kloure Pòtoprens nan sèkèy la!
Nouvèl asasinay ansyen direktè EPPLS la, Yvon Bissereth ak yon pwòch li, Ronald Momplaisir nan Kafou Dezire, Laboul 12, samdi 6 dawou 2022 a, se yon pwa ki tonbe sou tèt anpil moun ki frekante wout sa pou ale nan Gransid peyi a. Sèl posibilite sa a jiska samdi 6 jiyè 2022 a pou yon moun te ka kite depatman Lwès direksyon Sid peyi a san gwo kè kase andanje.
Okay, 15 dawou 2022
Mwa jen pase a plizyè santèn moun te pran lari nan Vil Okay pou mande debloke Matisan ki se wout prensipal pou soti Pòtoprens pou ale nan 4 depatman: Sidès, Nip, Sid ak Grandans peyi a ki plis pase 12 mwa bloke akòz egzaksyon bandi byen ame k ap simen laterè .
Sitiyasyon sa a vin pouse sitwayen ki gen posibilite ki vle ale nan Gransid peyi a epi pa gen lajan pou peye avyon chèche wout dekoupe tankou Tikajou, Senjid , Taraz pou evite Matisan ki tounen yon koulwa lanmò.
Si gen yon kote ki te mwens ekspoze se wout ki soti Laboul 12 pase pa kafou Dezire pou ale Taraz , Senwòk pou vin tonbe nan Dikini 63, komin kafou. Se yon wout ki pa fin kòdyòm. Li nan yon movèzeta epi se grenpe mòn ak gwo wòch. Nan moman lapli tonbe se yon kalvè pou moun k ap frekante l. Wout sa pwovoke anpil aksidan ki lakòz plizyè moun deja pèdi lavi yo san konte machin ki kraze. Men malgre sa se anpil moun ki pran wout sila a yon fason pou evite dezagreman bandi yo.
Soti kafou Laboul 12 pou rive Dikini 63 ap pran yon moun ki nan yon machin touteren 1 èdtan pou pipiti, 50 minit sou moto. Anvan kesyon kriz gaz fabrike a moto yon pasajè te bezwen ant 750 a 1000 goud soti Dikini pou vin Petyonvil men lajounen jodi li bezwen 1500 a 2000 goud pou trajè sa a.
Gang timakak ki nan Laboul 12 gen plis pase yon lane ap opere nan zòn nan. Plizyè moun deja viktim tankou: Enspektè polis Dan Jerry Toussaint, pitit ansyen Senatè Dany Toussaint, gang sila a te asasinen, premye janvye 2022 pase a nan kad yon operasyon pou te deloje bandi sa yo nan zòn nan; 6 janvye 2022, bandi k ap opera nan Laboul 12 asasinen Wilguens Louissaint et Amady John Wesley 2 jounalis pandan yo te pral fè yon repòtaj sou lanmò Enspektè polis Dan Jerry Toussaint ; 8 fevrye 2022 vè 8 tè nan aswè moun ak zam simen kout bal nan kafou Laboul 12 , yon moun mouri ak plizyè lòt blese , menm lokal sou komisarya a te touche ak bal; 5 me 2022 bandi ak zam kidnape 2 moun pami yo Benetty Augustin, yon pedyat nan kafou Taraz; nan lannwit 19 pou rive 20 jiyè 2022 a nan batay ant Gwoup Fesa ak gang Ti Makak pou teritwa, 6 moun mouri pou pipiti pami yo yon fanm. Dènye zak ki pral kreye plis pè a se doub asasinay samdi 6 dawou 2022 nan apremidi, pandan ofisyèl la ak pwòch li a t ap pran direksyon depatman Sid. Apre yo te fin tire yo, bandi kole dife nan machin nan ak tout kadav mesye yo.
Gwoup gang sa yo ki ta yon pwolonjman gang k ap opere nan rantre sid kapital la di y ap goumen pou kesyon tè Mosanto Petit Alyas Toto Bòlèt ta pran pa sispann teworize popilasyon an ki se prensipal viktim nan reprezay y ap komèt. Lapolis sou bò pa l reyalize plizyè opresayon men sa pa anpeche bandi yo toujou ap opere nan zòn sa a.
N ap raple, sa gen plis pase yon lane kote gang ame barikade tout kote yon moun kapab pase pou kite Pòtoprens kise kapital peyi a pou ale nan lòt depatman yo. Yon veritab estrateji militè. Pou anpil moun Taraz sete sèl mwayen kite miyò pou yon moun pran wout gransid la malgre gang sa yo konn toujou parèt tèt yo men pat an pèmans menm jan ak lòt kote tankou Kwadèboukè, Site Solèy ak Matisan.
RTM
