36 Bilten “Vwa Pèp La Ak 100 Vwa Rezistans Popilè ” Ki Bilan?
“Materyalis Dyalektik ak Materyalis Istorik ” la, montre nou ke se kondisyon lavi materyèl yon pèp ak reyalite materyèl yo ki detèmine kalite lide k ap sikile nan sosyete a e se lide sa yo ki fòs prensipal pou tout devlopman. Kòm evènman istorik yo konekte e yonn depann delòt, etid listwa peyi a se yon syans k ap pèmèt mas popilè yo konprann e dekòtike evènman politik yo, pou jwenn chemen kòrèk la nan aktivite pratik mas yo nan batay pou Liberasyon peyi a.
Evènman 6-7 jiyè 2018 yo ki te debouche sou premye mouvman “Peyi Lòk “la, pote anpil eleman nouvo sou sèn politik la. Nati ak pwofondè revandikasyon ki t ap chofe beton an, te kreye yon nouvo lidèchip ki te bouskile tout politisyen tradisyonèl yo. Nouvo reyalite sa, kote pèp la ap mande souverènte ak chanjman nan sistèm neyokolonyal la, pou popilasyon an patisipe nan zafè ekonomik peyi a, pat kite plas pou politisyen woulemdebò. Revandikasyon popilè yo te totalman opoze ak plan konplo Core-Gwoup la, mèt neyokoloni an ak oligachi lokal la kont peyi a. Se nan kontèks boukan dife sa, Komite Rezistans Popilè Benwa Batravil te deside pibliye yon Bilten chak semèn sou non ” Vwa Pèp La ki vin Vwa Rezistans Popilè “, pou ede klere chemen Mobilizasyon pèp la. Sepandan apre 5 lane, Dirèktwa KRPBB a ta renmen wè ak tande kritik tout kamarad ak konpatriyòt ki te angaje tan yo nan lèkti Bilten yo, pou fasilite manm Komite a pote koreksyon ki nesesè pou rann travay la pi efikas nan Lit Liberasyon an.
“Materyalis Dyalektik ak Materyalis Istorik ” la, montre nou ke se kondisyon lavi materyèl yon pèp ak reyalite materyèl yo ki detèmine kalite lide k ap sikile nan sosyete a e se lide sa yo ki fòs prensipal pou tout devlopman. Kòm evènman istorik yo konekte e yonn depann delòt, etid listwa peyi a se yon syans k ap pèmèt mas popilè yo konprann e dekòtike evènman politik yo, pou jwenn chemen kòrèk la nan aktivite pratik mas yo nan batay pou Liberasyon peyi a.
Apre evènman 2018 yo, KRPBB antre nan batay ak Bilten “Vwa Pèp La e Vwa Rezistans Popilè ” , ak objektif pou fè pwopagann ak ajitasyon nan mitan mas popilè yo. KRPBB kwè atravè yon ansanm analiz konkrè anndan Bilten yo sou reyalite sosyal, ekonomik ak politik nasyonal e entènasyonal, lide Maksis-leninis (ML) k ap degaje yo, ka ride Mobilizasyon an pran yon liy pi klè k ap kondui nan direksyon objektif la. Konsa nan koumansman, tematik Bilten yo te baze sou listwa ak kilti peyi a paske konesans sou kouman sosyete a viv ak kijan l devlope, se yon konesans ki gen valè syantifik. Donk Materyalis Dyalektik ak Materyalis Istorik la, se yon zouti ki dwe sèvi bousòl pou mas yo òganize sosyete a. Ositou, KRPBB trete e analize tout evènman nasyonal ak entènasyonal ki ka pote yon enterè kèlkonk pou fè avanse batay mas popilè yo.
Anmenmtan tou, pou kenbe motivasyon mas popilè òganize yo nan yon nivo nesesè, KRPBB itilize metòd ajitasyon pou l teke evènman konjonktirèl yo. Sepandan, kòm p ap ka gen yon gwo ajitasyon san yon gwo òganizasyon nan mitan mas popilè yo, batay mobilizasyon an ap tonbe leve paske nivo òganizasyonèl mas popilè yo pa sifizan pou fè faskare ak nouvo reyalite yo. Ajitasyon politik mande lidè sou teren ki gen konfyans ak zòrèy mas popilè yo e l mande moun ki p ap vann batay pèp la. Jodi a, kote sitiyasyon an vin pi difisil ak prezans Gang yo, sèl yon gwo òganizasyon disipline ka ede mas yo goumen kont nouvo difikilte sa yo, paske Ameriken mande Gang yo monte nivo vyolans lan pou fèmen tout espas lit demokratik yo.
Kidonk, Komite Rezistans Popilè Benwa Batravil ap rapouswiv atravè tèks li pibliye chak semèn yo, yon objektif ki gen 2 pati prensipal:
– Yon pati pwopagann, nan difize lide Maksis-leninis yo, pou gide mas popilè yo sou chimen yon liy politik revolisyonè klè;
– Yon pati ajitasyon, nan itilize evènman konjonkti nasyonal ak entènasyonal ki gen rapò ak enterè mas yo, pou kreye motivasyon kay popilasyon ayisyèn nan, pou l rete atache ak objektif Liberasyon peyi a. Nan gwo moman difisil la, li enpòtan pou tout pwogresis ak konpatriyòt ki enterese nan lèkti Bilten yo, voye opinyon ak kritik yo bay Dirèktwa Komite a pa Watsap oswa nan email: [email protected]
Viv Mobilizasyon Pèmanan Pou Pwojè Nasyonal La!
Viv Inite Popilè Nan Lit Liberasyon an!
Libète ou Lanmò.
Komite Rezistans Popilè Benwa Batravil, KRPBB, 6 nov 2023.
